Omar al-Bashir: Ashtakiwa Kwa Mapinduzi Yaliyomsaidia Kuchukua Madaraka

Omar al- Bashir
Aliyekuwa rais wa Sudan Omar al- Bashir amefunguliwa kesi katika mji mkuu wa taifa hilo Khartoum , kuhusiana na mapinduzi ya kijeshi yaliyomsaidia kuchukua mamlaka zaidi ya miongo mitatu iliopita.
Bashir mwenye umri wa miaka 76 ambaye alihukumiwa kwa ufisadi, huenda akakabiliwa na hukumu ya kunyongwa iwapo atapatikana na hatia kuhusu jukumu lake katika mapinduzi hayo ya 1989.
Zaidi ya maafisa 20 wa zamani wanashtakiwa pamoja naye
Bashir alilazimishwa kuondoka mamlakani 2019 kufuatia maandamano makubwa.
Maandamano hayo ya raia yalianza polepole kabla ya kushika moto na kuwa wito dhidi ya rais Bashir kung'atuka madarakani. Tarehe 11 mwezi Aprili 2019, jeshi lilitangaza kwamba ameondolewa madarakani.
Serikali ya muungano ya mpito ilioshirikisha maafisa wakuu wa jeshi na raia ilibuniwa.
Bashir pia anasakwa na mahakama ya ICC kuhusu uhalifu wa kivita katika jukumu lake katika mauaji ya kimbari yaliotokea katika jimbo la Darfur.
Mamlaka ya Sudan ilisema February kwamba iko tayari kumpeleka kiongozi huyo wa zamani katika mahakama ya ICC.


EmoticonEmoticon