Polisi Yavamia Majengo Yenye Mafungamano Na Navalny

 

Polisi mjini Moscow wamefanya uvamizi na kuendesha upekuzi mkali kwenye majengo na ofisi zenye mafungamano na familia au washirika wa mwanasiasa wa upinzani aliye kizuizini Alexei Navalny pamoja na kumkamata kaka yake. 

Duru kutoka mjini Moscow zimesema maeneo yaliyofanyiwa upekuzi ni pamoja na makaazi ya Nayalny, ambako kaka yake aitwaye Oleg amekutwa na kukamatwa, na nyumba nyingine ya kukodi alimokuwa akiishi mke wa mwanasiasa huyo aitwaye Yulia.

Wakili wa mke wa Navalny, Veronika Polyakova amewaambia waandishi habari kwamba polisi haikumruhusu yeye kushiriki uvamizi na upekuzi uliofanyika, jambo ambalo anadai limevunja haki ya mteja wake ya kuwakilishwa kisheria na kutoa utetezi.

Maeneo mengine yaliyovamiwa na polisi ni ofisi za wakfu wa Navalny unaoshughulikia mapambano dhidi ya rushwa na jengo linalotumika kutayarisha video na maudhui ya mtandaoni ya mwanasiasa huyo wa upinzani.

Polisi pia ilipekua makaazi ya kiongozi wa muungano wa madaktari nchini Urusi Anastasia Vasilyeva, ambaye anatajwa kuwa mshirika wa Navalny.

Idara ya polisi haijatoa maelezo yoyote kuhusiana na operesheni yake lakini washirika wa Navalny wamesema kupitia mitandao ya kijamii kwamba wanahusishwa na ukiukaji wa masharti ya afya kwa kuandaa na kushiriki maandamano ya kupinga kuwekwa kizuizini kwa Navalny yaliyofanyika Jumamosi iliyopita mjini Moscow.


EmoticonEmoticon