Guterres Asikitishwa Na Kiwango Kidogo Cha Fedha Kuisaidia Yemen

 

Antonio Guterres ameonya juu ya kile alichokitaja kama "hukumu ya kifo kwa familia za Yemen" baada ya mkutano wa wafadhili wa kimataifa kupata chini ya nusu ya fedha zinazohitajika ili kuzuia baa la njaa nchini humo. 

Mkutano huo wa wafadhali wa kimataifa ulifanikiwa kupata dola bilioni 1.7 pekee. Guterres ameonyesha kusikitishwa na kiwango hicho cha fedha.

Katika mkutano uliofanyika kwa njia ya Video, katibu mkuu huyo wa Umoja wa Mataifa alikuwa anakusudia kuchangisha angalau dola bilioni 3.85 mwaka huu ili kushughulikia mahitaji ya watu nchini Yemen wanaokabiliwa na baa la njaa.

Hata hivyo, fedha za mwaka huu zilikuwa kidogo tofauti na fedha ambazo Umoja wa Mataifa ulipata mwaka uliopita.

Vile vile, fedha hizo zilikuwa pungufu ya dola bilioni moja tofauti na kiwango cha fedha kilichoahidiwa katika mkutano wa mwaka 2019.

Ofisi ya Umoja wa Mataifa ya uratibu wa masuala ya kibinadamu imeonya kuwa zaidi ya watu milioni 16 watakabiliwa na njaa mwaka huu, huku tayari nusu kati yao wakiishi katika mazingira magumu ya ukosefu wa lishe bora.


EmoticonEmoticon